Batxilerreko filosofiaren topagune

 Ezin esan

Ezin da esan Libertatea, ezin da esan Berdintasuna,

ezin da esan Anaitasuna, ezin esan.

Ez zuhaitz ez erreka ez bihotz.

Ahaztu egin da antzinako legea.

Uholak eraman du hitzen eta gauzen arteko zubia.

Ezin zaio esan tiranoak erabaki irizten dionari heriotza.

Ezin da esan norbait falta dugunean,

oroitzapen txikienak odolusten gaituenean.

Inperfektua da hizkuntza, higatu egin dira zeinuak

errotarri zaharrak bezala, ibiliaren ibiliz. Horregatik

ezin da esan Maitasuna, ezin da esan Edertasuna,

ezin da esan Elkartasuna, ezin esan.

Ez zuhaitz ez erreka ez bihotz.

Ahaztu egin da antzinako legea.

Alabaina "ene maitea" zure ahotik entzutean

aitor dut zirrara eragiten didala,

dela egia, dela gezurra.

Kirmen Uribek orain sei urte "bitartean heldu eskutik" poema liburua idatzi zuen. Oso ederra. Oraingoan gogora dakardan poema honekin bere buru argia erakusten digu. Filosofiak beti antzeman nahi izan dituen hitz handiosoak, hizki larriekin idazten ditugun hitz handiputzak ezin dira esan. Bere handitasun absolutuan agian ez dira ezer. Non dira, bada, elkartasun, edertasun eta maitasun zirrara horiek? Non da hitz horien egia?. Badira nonbait esaten dutenak hitzak besterik ez direla, eta haien atzean ez dagoela erreal denik, hiztunak eman nahi duen intentziorik ezean.

Jorge Oteiza. Ezer eza, espazio hutsa ikusten irakatsi omen zuen Oteizak. Eta hutsetik irudimenez sortzeko beta baliatzen. Pentsa dezagun blog hau orri zuri baten antzerakoa dela, hutstarte bat besterik ez. Baina aldi berean norberak irudimenari eta pentsamenduari emateko abagunea. Irudimen horretatik zerbait sortuz gero, idatzi egingo dugu. Bestela, berriro ezereza. Produktua, bloga ez da garrantsizkoena, irudimenari eta adimenari eragiteko egin dugun saioa baizik.

Aurreko guztia ekarri dut gaur Kultur Leioa-n dastatu dudan "Otehitzari biraka" ikuskizunetik. Jorge Oteizari buruzko dantza eta bideo emankizun ederra.